तिलोत्तमा । रुपन्देहीको तिलोत्तमा नगरपालिका ४ स्थित श्रृङ्गेश्वर धाम एवं ज्येष्ठ नागरिक मिलन केन्द्रको गुरुयोजना पूरा गर्न धाम परिषरमा बिहीबारदेखि महायज्ञ लगाइने भएको छ । मन्दिर परिषरको संरचनासंगै ज्येष्ठ नागरिक मिलन केन्द्रको भवन निर्माणका लागि आवश्यक पर्ने आर्थिक सहयोग जुटाउन महायज्ञ गर्न लागिएको मंगलबार आयोजना गरिएको पत्रकार सम्मेलनमा जानकारी गराईएको हो ।
१८ कठ्ठा क्षेत्रफलमा फैलिएको धाम परिषरमा रहेको जेष्ठ नागरिक मिलन केन्द्रको भवन निर्माणको लागि आर्थिक संकलन गर्ने उद्देश्यले यहि माघ २४ गतेदेखि फागुन २ गतेसम्म श्रीमद्भागवत ज्ञान–विज्ञान श्रृङ्गेश्वर धार्मिक महा महोत्सव तथा श्रृङ्गारिक महाआरती गर्न लागिएको श्रृङ्गेश्वरधाम एवं महायज्ञ आयोजक समितिका अध्यक्ष ऋषि भण्डारीले जानकारी गराउनुभयो ।
महायज्ञको बिहिबार तिलोत्तमा नगरपालिकाका नगरप्रमुख रामकृष्ण खाँणले उद्घाटन गर्नुहुनेछ भने विहान शोभा कलश यात्रा गरिने जेष्ठ नागरिक मिलन केन्द्रका अध्यक्ष एवम महायज्ञ सम्पादन समितिका संयोजक यदुनाथ पाण्डेले बताउनुभयो । संयोजक पाण्डेका अनुसार महायज्ञबाट संकलित रकम ज्येष्ठ नागरिक मिलन केन्द्रको भवन निर्माणमा खर्च गरिने छ ।
मन्दिरको बृहत् भौतिक संरचना निर्माण संगै ज्येष्ठ नागरिक मिलन केन्द्रको लागि आवश्यक भवन, ज्येष्ठ नागरिकको सेवा एवं प्राकृतिक चिकित्सा उपलब्ध गराउन माघ २४ गतेदेखि फागुन २ गतेसम्म सुप्रसिद्ध कथाबचक पुज्य आचार्य ओमप्रकाश सुवेदी प्रमुख बाचकका रुपमा रहने यज्ञ आयोजक मूल समितिका संयोजक पाण्डेले जानकारी दिनुभयो । महायज्ञको अवसरमा बिहीबार बिहान १० बजे धाम देखि कलश यात्रा शुरु भई योगिकुटी स्थित होटल पौवा, सिता राइस मिल चोकहुंदै कलश यात्रा धाम परिषरमा पुग्नेछ ।
महायज्ञ अवधिभर योग एवं ध्यान शिविर, कथा प्रवचन भजन, सामूहिक ब्रतबन्ध, चौरासी पुजा, ग्रह शान्ति, तुलादान, रुद्राभिसेक, बिशेष कर्म समेत गरिने भएको छ भने भगवानको झाँकी प्रदर्शन गर्नुको साथै लाखबत्ती प्रज्ज्वलन तथा रात्रि जागरण समेत गरिने धाम तथा ज्येष्ठ नागरिक मिलन केन्द्रका प्रमुख संरक्षक डा.नारायण प्रसाद पन्थले बताउनुभयो । समितिले मंगलबार गरेको पत्रकार सम्मेलनमा प्रचार समितिका संयोजक खिमानन्द भट्टराईले महायज्ञ संचालन सप्ताह अवधिभर सो पुनित कार्यमा सहभागी हुन सम्पूर्ण राजनीतिक दल, विभिन्न संघ–संस्था र समुदायलाई आग्रह गर्नुभयो ।
धाम परिषरमा निर्माण गरिने ५ तले ज्येष्ठ नागरिक मिलन केन्द्र भवनको सोमबार नेपाल सरकारका उपप्रधान तथा अर्थमन्त्री बिष्णु पौडेलले गर्नुभएको थियो । गुरुयोजना अनुसार काम पूरा गर्ने क्रममा रहेको धामले हालसम्म बिभिन्न संरचना निर्माणमा ६ करोड बढी खर्च गरिसकेको पत्रकार सम्मेलनमा जानकारी गराईएको थियो । ज्येष्ठ नागरिक मिलन केन्द्रले ९० जना ज्येष्ठ नागरिकहरुलाई दिवा कालिन सेवा उपलब्ध गराउंदै आएको छ ।
