बुटवल । बुटवल उपमहानगरपालिकाले डेंगी नियन्त्रणका लागि खोज र नष्ट गर अभियान सञ्चालन गर्ने भएको छ ।
उपमहानगरपालिकामा बुधबार बसेको सरोकारवालासहितको बैठक तथा अन्तरक्रिया कार्यक्रमले बिहीबारदेखि १९ वटै वडामा एकसाथ खोज र नष्ट गर अभियान सञ्चालन गर्ने निर्णय गरेको स्वास्थ्य शाखाका उपनिर्देशक युवराज पाण्डेले जानकारी दिनुभयो । उहांका अनुसार विद्यालय, संघसंस्था, अस्पतालहरुलाई समेत सचेतना कार्यक्रम सहित डेंगी नियन्त्रण अभियानमा सहभागि गराउने निर्णय भएको छ ।
छलफलका क्रममा डेंगी महामारीको समयमा डेंगी परीक्षण शुल्कमा एकरुपता कायम राख्न बुटवलभित्रका प्रयोगशाला सहमत भएको तथा स्वास्थ्यसम्बन्धि निजी र सरकारी अस्पतालहरुले डेंगीबारेका सचेतना कार्यक्रमहरु सञ्चालन गर्ने निर्णय भएको पनि उपनिर्देशक पाण्डेले बताउनु भयो ।
बुटवल उपमहानगरपालिकामा तत्काल डेंगीका संक्रमितको संख्या नबढीसकेकोले सचेतना कार्यक्रम सञ्चालन गर्ने र आवश्यकताअनुसार फिभर क्लिनिक सञ्चालन गर्नेसम्मको तयारी पनि भएको छ ।
‘१९ वटै वडामा अभियान सञ्चालन गर्ने गरी कार्ययोजना तयार गरेका छौं–पाण्डेले भन्नुभयो–‘यो अभियान निरन्तर सञ्चालन हुन्छ र यसमा सबैको सहभागिता र सचेतना जरुरी हुन्छ, यदि व्यक्ति सचेत भएन भने अभियान सञ्चालन गरेर मात्रै हामीले संक्रमण रोक्न सक्दैनौं, पानी जम्न दिनुभएन र लामखुट्टेको टोकाइबाट बच्नुप¥यो ।’
हरेक कार्यालयहरुमा हरेक शुक्रबार १० बजे १० मिनेट कार्यक्रम सञ्चालन गर्दै डेंगी नियन्त्रणका लागि सबैले अभियान सञ्चालन गर्न उपमहानगरपालिकाले आह्वान गर्ने छ । हरेक शुक्रबार १० मिनेट आफ्नो कार्यालयको आसपासमा पानी जम्ने खाल्डाखुल्डी छन् कि छैनन् भन्ने अवलोकन गर्ने र लामखुट्टेले अण्डा पार्न सक्ने स्थान भएमा लार्भा नष्ट गर्ने कार्य अभियानकै रुपमा सञ्चालन हुने छ ।
संक्रमितको तथ्यांक एकीकृत रुपमा संकलन गरी राखेर एकद्वार प्रणालीबाट बुटवल उपमहानगरपालिकालाई बुझाउने निर्णय गरिएको उपनिर्देशक पाण्डेले बताउनु भयो ।
निजी क्लिनिकमा जाँच गरेर उपचार गराउनेहरुले संख्यासमेत नगरमा उपलब्ध गराउनका लागि नगरले आग्रह गर्ने निर्णय भएको छ । रुपन्देहीमा ४६ जना संक्रमित फेला परेको अस्पतालहरुले बताएपनि बुटवलमा अहिलेसम्म संक्रमित फेला नपरेको उपमहानगरपालिकाले जनाएको छ ।
कार्यक्रममा बोल्दै नगरप्रमुख खेलराज पाण्डेयले बुटवलभित्र डेंगी नियन्त्रणमा नगरले नियमित रुपमा अभियान सञ्चालन गर्ने बताउनु भयो । उहांले सबैले एकसाथ अभियान सञ्चालन गरेर संक्रमण फैलिन नदिनतर्फ ध्यान दिनुपर्नेमा जोड दिनुभयो । आवश्यक पूर्वतयारी र उपचारका लागि सबै सामग्रीहरु तयारी अवस्थामा राख्ने र आवश्यकताअनुसार फिभर क्लिनिक र औषधिउपचारको व्यवस्था गर्ने उहांले बताउनु भयो ।
