काठमाडौं । संयुक्त राष्ट्र संघको खाद्य तथा कृषि संगठनको ‘फूड सिस्टम समिट प्लस टु’मा सहभागी हुन प्रधानमन्त्री पुष्पकमल दाहाल आज इटली प्रस्थान गर्दै हुनुहुन्छ । नेपाली प्रतिनिधमण्डलको नेतृत्व गर्दै प्रधानमन्त्री दाहाल आज(शनिबार) साँझ इटली जान लाग्नुभएको हो ।
संयुक्त राष्ट्र संघको खाद्य तथा कृषि संगठनको मुख्यालय इटालीको रोममा आयोजना हुने ‘युनाटेड नेसन्स फूड सिस्टम २०२३ स्टकिङ मोमेन्ट’ मा प्रधानमन्त्री दाहालले विशेष सम्बोधन गर्ने कार्यक्रम छ ।
यही साउन ८ देखि १० गतेसम्म आयोजना हुने कार्यक्रमको उद्घाटन सत्रमा प्रधानमन्त्री दाहाल सहभागी हुने कार्यक्रम छ । अतिकम विकसित मुलुकको अध्यक्षको हैसियतमा दाहालले विशेष सम्बोधन गर्ने कार्यक्रम तय भएको परराष्ट्र मन्त्रालयले जनाएको छ ।
सोही दिन नै प्रधानमन्त्री दाहालले विद्यालय भोजनको बारेमा आयोजना गरिएको छलफल सत्रमा पनि सहभागी जनाउनु हुनेछ । साउन ९ गते खाद्य प्रणाली परिवर्तन र अभ्यासमा सन्दर्भमा आयोजना हुने छलफल पनि प्रधानमन्त्री सहभागी हुनुहुनेछ ।
भ्रमणका क्रममा प्रधानमन्त्री दाहालले संयुक्त राष्ट्र संघका उच्च अधिकारीसँग साइडलाइनमा भेटवार्ता गर्ने कार्यक्रम तय भएको बताइएको छ । प्रधानमन्त्री दाहाल नेतृत्वको भ्रमण दलमा स्वकीय सचिव गंगा दाहाल, कृषि तथा पशुपंक्षी विकासमन्त्री बेदुराम भुसाल, राष्ट्रिय योजना आयोगका सदस्य डा.जयकान्त राउत, सुरक्षाकर्मी एवं सञ्चारकर्मीको सहभागिता रहनेछ । प्रधानमन्त्री दाहाल साउन १२ गते स्वदेश फर्किने कार्यक्रम छ ।
