बुटवल । आसन्न मंसिर ४ गतेको निर्वाचनमा रुपन्देही क्षेत्र नं २ (ख) का प्रदेश सभा तर्फका गठबन्धनका साझा उम्मेद्वार वामदेव क्षेत्रीले स्थानीय तहमा गठबन्धनको सरकार रहेकाले अबको विकासका लागि प्रदेश र संघीय सरकार पनि गठबन्धनकै सरकार बन्न आवश्यक रहेको औल्याउनुभएको छ ।
विकासका लागि तिनै तहका सरकारको समन्वय आवश्यक रहेको बताउँदै उहांले स्थानीय तह निर्वाचनमा अधिकांश स्थानीय तहमा गठबन्धनको सरकार बनाउने जनताको म्याण्डेट आइसकेकाले आसन्न मंसिर ४ को चुनाबमा पनि गठबन्धनलार्ई ५ वर्षका लागि विजयी गराएर जनताले म्याण्डेट दिनुपर्ने बताउनुभएको हो ।
बृहत महिला भेला तथा प्रशिक्षण कार्यक्रमलाई सम्बोधन गर्दै उम्मेद्वार क्षेत्रीले झुम्साको पानी र लालपुर्जालाई राजनीति खेल बनाएर पटक पटक झुटो आश्वासन दिने काम एमाले उम्मेद्वारहरुले गरेको बताउँदै आफुले जनतासंग झुटको खेती नगर्ने बताउनुभयो ।
यस्तै तमु ह्युल छोंजधी गुरुङ राष्ट्रिय परिषद् रुपन्देहीले बुटवलमा आयोजना गरेको उम्मेद्वार भेटघाट तथा परिचयात्मक कार्यक्रमममा बोल्दै क्षेत्रीले आफुले जनतासंग झुटको राजनीति नगर्ने नगर्ने जिकिर गर्नुभयो । संविधानको रक्षा र प्रतिगमन परास्तका लागि गठबन्धन बनेको औल्याउँदै उहांले आसन्न निर्वाचनमा गठबन्धन भन्दा बाहिरको दलहरुलाई म्याण्डेट दिइएमा उनीहरुले विकास गर्न नसक्ने दावी गर्नुभयो ।
केन्द्र सरकारको नीति र योजना कार्यान्वयन गर्ने जिम्मा स्थानीय तहको सरकारको रहेकाले स्थानीय र केन्द्रमा फरक फरक दलको सरकार आएमा काम गर्न नसक्ने उहाँको धारणा थियो । त्यसैले यस क्षेत्रमा आफुहरुलाई जनताले जिताउनुको विकल्प नरहेको उहांको भनाई थियो ।
सोही क्रममा वक्ताहरुले लोकतान्त्रिक गठबन्धनका उम्मेद्वद्वारहरुलाई देशैभरी जिताउन समेत अपिल गरेका छन् । कार्यक्रममा राष्ट्रिय जनमुक्ति पार्टीका संघीय समानुपातिक उम्मेद्वार झम बहादुर गुरुङले गठबन्धन देशको आवश्यक्ता रहेको बताउदै जित सुनिस्चित भएको बताउनु भयो ।
उहांले एमाले तर्फ लक्षित गर्दै अहिलेको चुनावमा एमालेलाई भोट माग्ने कुनै नैतिक आधार नभएको बताउनुभयो । जनताको मतादेश पाउँदा लत्याउने र फेरी मतादेश देउ भन्नु लज्जास्पद र पश्चगमन मानसिकताको उपज रहेको उहांको भनाई थियो ।
कार्यक्रममा गठवन्धनका नेताहरु चीन बहादुर गुरुङ, झपट बहादुर गुरुङ, राम बहादुर गुरुङ, क्या. टेक बहादुर गुरुङ लागयतले बोल्नु भएको थियो । कार्यक्रम तमु ह्युल छोंजधी गुरुङ राष्ट्रिय परिषद् रुपन्देहीका अध्यक्ष बीमला गुरुङको अध्यक्षता तथा आसा गुरुङको सञ्चालनमा भएको थियो ।
