सैनामैना, २४ असोज । रुपन्देही क्षेत्र नम्बर ५ मा नेकपा एमालेका वासुदेव घिमिरेले आधिकारिकता पाएका छन् । निर्वाचन आयोगले प्रतिनिधि सभा सदस्य उम्मेदवारमा एमालेबाट उम्मेदवारी दर्ता गराएका घिमिरेलाई पार्टीको आधिकारिक उम्मेदवार ठहर्याएको हो ।
आइतबार रूपन्देही–५ मा एमालेबाट बासुदेव घिमिरे र खिमलाल भट्टराईले उम्मेदवारी दर्ता गराएका थिए । घिमिरेले दिउँसो साढे ३ बजे र भट्टराईले पौने ५ बजे उम्मेदवारी दर्ता गराएका थिए ।
एउटै पार्टीको उम्मेदवारी परे पहिला जसले दर्ता गरायो उसैले आधिकारिकता पाउने निर्वाचन निर्देशिका २०७९ मा उल्लेख रहेको निर्वाचन अधिकृत चिन्तामणी शर्माले जानकारी दिए ।
निर्वाचन अधिकृत शर्माले निर्वाचन ऐन तथा निर्देशिका अनुसार पहिलो पटक दर्ता भएका बासुदेव घिमिरेलाई आधिकारिता प्रदान गरिएको बताए ।
एमाले अध्यक्ष केपी शर्मा ओलीले पहिला घिमिरेलाई टिकट दिए पनि पछि राष्ट्रिय सभा सदस्य रहेका भट्टराईलाई टिकट दिएर मनोनयन गर्न पठाएका थिए । मनोनयनका बेला एउटै पार्टीका दुइ नेताका नेता–कार्यकर्ताबिच लफडा समेत भएको थियो । रूपन्देही–५ मा सत्ता गठवन्धनबाट नेपाली कांग्रेसका नेता भरतकुमार शाह प्रतिनिधि सभा सदस्य उम्मेदवार छन् ।
