बुटवल, ६ असार । नेकपा एमाले निकट अनेरास्ववियुले पेट्रोलियम पदार्थको मुल्यबृद्धि बिरुद्ध बुटवलमा आन्दोलन गरेको छ ।
सोमबार बिहान बुटवल बहुमुखी क्याम्पस अगाडी सडकमा जम्मा भएका अनेरास्ववियुका कार्यकर्ताले यातायात बन्द गर्नुका साथै टायर बालेर नाराबाजी गरेका थिए । नेपाल आयल निगमले पेट्रोलियम पदार्थको मूल्यमा भारी वृद्धि गरेपछि विद्यार्थीहरुले बिरोध गरेका हुन् ।
सकारले पेट्रोलको प्रति लिटर १९ रुपैयाँ र डिजेल तथा मटिट्लेतमा प्रति लिटर २७ रुपैयाँले वृद्धि गरेको छ । एकै पटक भारी मात्रामा प्रतिलिटर मूल्य वृद्धि भएको यो पहिलो पटक हो । खाना पकाउने एलपीजी ग्यासको मूल्य भने यथावत रहेको छ । पेट्रोलको नयाँ मूल्य प्रतिलिटर १९९ रुपैयाँ भएको छ भने डिजेल र मट्टितेल प्रतिलिटर १९२ रुपैयाँ पुगेको छ ।
अनेरास्ववियु रुपन्देही अध्यक्ष शेषकान्त पोखरेलले सरकारले जनताको ढाड सेक्ने गरी मूल्यवृद्धि गरेको भन्दै निर्णय नसच्याएसम्म आन्दोलन जारी रहने बताउनुभयो ।
