परासी, २ असार । नेपाली कांग्रेसका केन्द्रीय सदस्य देबेन्द्रराज कँडेल र संविधान सभा सदस्य देवकरण कलवारलाई कारबाहीको माग गर्दै उजुरी परेको छ । जिल्ला समन्वय समिति नवलपरासीको निर्वाचनको विषयलाई लिएर प्रतिनिधि सभा सदस्य समेत रहेका कांग्रेस नेता कँडेल र कलवारलाई कारबाहीको माग गर्दै उजुरी परेको हो ।
नेपाली कांग्रेसबाट जिल्ला समन्वय समिति प्रमुख पदमा उम्मेदवारी दिएका बालिन्द्र बिक्रम शाहीले कांग्रेसभित्र बाटै अन्तरघात भएका कारण पार्टीले हार ब्यहोर्नु परेको दाबी गर्दै दुई नेताबिरुद्ध पार्टीको जिल्ला अनुशासन समितिमा उजुरी दिएका हुन् ।
सात स्थानीय तह रहेको जिल्लामा जिससमा कुनै पनि दलको बहुमत नपुगेपछि कांग्रेसले माओवादी केन्द्रसँग गठबन्धन गरेको थियो । गठबन्धन गरेर आवश्यक पर्ने आठ मत पु¥याएको कांग्रेसका उम्मेदवार शाही एक मतले पराजित भएका थिए । जिसस प्रमुखबाहेक गठबन्धनका सबै उमेदवार विजयी भएका छन् ।
पाँच मत मात्र रहेको एमालेले एक मत रहेको राप्रपासँग गठबन्धन गरेको थियो । चुनावमा एमालेका प्रमुख पदका उमेदवार रुदल यादव सात मत ल्याएर विजयी भएका थिए भने पराजित शाहीले ६ मत पाएका थिए । चुनावमा प्रमुख पदको एक मत बदर भएको थियो । अर्को एक मतमा अन्य पदमा कांग्रेस–माओवादी गठबन्धनका उमेदवारलाई भोट दिएपनि प्रमुख र उपप्रमुखमा सूर्य चिन्हमा दिइएको थियो ।
अनुशासन समितिका जिल्ला संयोजक एंव पार्टी जिल्ला उपाध्यक्ष विक्रम यादवलाई बुझाएको उजुरी पत्रमा गठबन्धनमा रहेका माओवादी केन्द्रका दुई जनप्रतिनिधिले गठबन्धनमै मत दिएको प्रमाण पेश गरेकाले कांग्रेसबाट निर्वाचित जनप्रतिनिधिले नै मत नदिएर पराजित भएको दाबी गरिएको छ । नेता कँडेल र कलवारकै निर्देशनमा आफ्नै जनप्रतिनिधि मतदातालाई एमाले गठबन्धनका उमेदवारलाई भोट दिन लगाएकोले उनीहरुमाथि छानविनसहित कारबाही गर्न माग गरिएको हो ।
जिल्लामा रहेका कांग्रेसका दुई गुटका कारण हरेक पटक विवाद हुँदै आएको छ । एउटा गुट केन्द्रीय सदस्य कँडेलको छ भने अर्को गुट कांग्रेस लुम्बिनी प्रदेशका महामन्त्री एंव संविधान सभा सदस्य विक्रम खनालनको छ । स्थानीय निर्वाचनमा पनि कांग्रेसको वर्चस्व भएका पालिकामा गुटकै कारण हार व्यहोर्नु परेको जिल्लामा चर्चा छ ।
पछिल्लो पटक भएको जिसस चुनावमा पनि गुटकै कारण कांग्रेसले हारेको हो । जिससको प्रमुख पदमा कँडेलले आफ्नो गुटका व्यक्तिलाई उमेदवार बनाउन चाहेका थिए । तर खनाल गुटका उमेदवारले टिकट पाएपछि कँडेल गुटले हराउन चलखेल गर्न सक्ने भन्दै कांग्रेसकै मतदातामाथि निगरानी बढाउन थालिएको थियो । गुटकै कारण हार व्यहोर्नु परेको भन्दै अहिले खनाल गुटका कार्यकर्ता नेताद्वय कँडेल र कलवारप्रति आक्रोशित बनेका छन् ।
