बुटवल, ३ साउन । स्वास्थ्य विमा गरेका सञ्चयकर्ताहरुलाई बुटवलमा एक कार्यक्रमकाबीच चेक हस्तान्तरण गरिएको छ । राष्ट्रिय विमा कम्पनी लिमिटेड र कर्मचारी सञ्चय कोषको सम्युक्त आयोजनामा बुटवलमा चेक हस्तान्तरण गरिएको हो ।
कोष र कम्पनीबीच भएको सहमति अनुसार सञ्चयकर्ताले सामान्य रोग लागेमा एक लाख र जटिल रोग लागेमा १० लाखसम्मको औषधि उपचार विमा पाउने प्रावधान छ । त्यही योजना अन्तर्गत विमा दावी गरेका १५ जना सञ्चयकर्तालाई विमा रकम हस्तान्तरण गरिएको हो । विमा कम्पनी भैरहवाका प्रमुख सबिता गुरुङ र सञ्चयकोष बुटवलका प्रमुख रमेशचन्द्र बेल्बासेले संयुक्त रुपमा चेक हस्तान्तरण गर्नुभएको थियो ।
सो अवसरमा बोल्दै कर्मचारी सञ्चय कोष बुटवलका प्रमुख बेल्बासेले सञ्चयकोषमा आवद्ध सबै कर्मचारीको स्वास्थ्य बिमा बिमा कम्पनीमा भएको बताउनुभयो । कोष र कम्पनीले गरेको यो योजनाले कर्मचारीहरुलाई राहत महसुस भएको उहांले बताउनुभयो ।
सञ्चयकर्ता प्रदेश लेखा नियन्त्रण कार्यालयका प्रमुख दीपक ज्ञवालीले यो योजनाले कर्मचारी धेरै लाभान्वित हुने विश्वास गर्नुभयो । त्यसका लागि बिमा साक्षरता आवश्यक रहेको उहांको भनाई थियो ।
त्यस्तै विमा कम्पनीका विष्णुप्रसाद खनालले सञ्चयकोषका सञ्चयकर्ताको स्वास्थ्य विमाको सम्बन्धमा कम्पनीले गरेका उपलब्धीको विषयमा जानकारी गराउनुभयो । विमा कम्पनीमा सात लाखसम्मको दुर्घटना विमा सहित व्यवसायिक विमा समेत हुने उहांले बताउनुभयो ।
विमा कम्पनी सरकारको स्वामित्व भएको एक मात्रै संस्था हो । यसमा सवारीसाधन, कृषि, पशु विमा समेत हुदै आएको छ । तर विमा सम्बन्धी साक्षरता कम भएका कारण धेरै सेवाग्राहीहरु निजी कम्पनीमा जाने गरेका छन् ।
