सुत्केरी हुन भर्ना भएकी गुल्मी मदानेकी महिलाको लुम्बिनी प्रादेशिक अस्पतालको चरम लाप्रवाहीका कारण मृत्यु, २० गते छलफल गर्ने गरि सव उठाईयो

बुटवल १४ कार्तिक
लुम्बिनी प्रादेशिक अस्पताल बुटवलमा सुत्केरी व्यथा लागेर भर्ना भएकी एक महिलाको मृत्यु भएको छ । अस्पतालको लाप्रवाहीले मृत्यु भएको भन्दै मृतकका आफन्तले शव ३ दिन पछि मात्र बुझेका छन ।
गुल्मीको मदाने गाउँपालिका ३ भुजुङ्गेकी ३० वर्षीया गीता पुरीको लुम्बिनी प्रादेशिक अस्पताल बुटवलमा बुधबार साँझ मृत्यु भएको हो ।
दशैंअघि दुई पटक सोही अस्पतालमा जाँच गराएकी ती महिला बुधबार बिहान ११ बजे प्रसूतिका लागि अस्पताल भर्ना भएकी थिइन् ।
अस्पतालको लाप्रवाही र उपचार प्रकृया गलत भएको आफन्तको आरोप छ । मृतकका आफन्तले घटनाको निष्पक्ष छानबिन र दोषीमाथि कारवाहीको माग गर्दै शव नबुझ्ने अडानसहित अस्पताल गेट अगाडि विरोध जनाएका थिए् ।
‘मृत्यु हुनुभन्दा ५ मिनेट अघिसम्म फोनमा कुरा हुँदा मलाई राम्रो छ, बच्चाको धड्कन कम छ रे भनेकी थिइन्,’ मृतकका भाई मोहन पाण्डेले बताउनु भयो ।
५ मिनेटपछि त मृत्यु भयो भन्ने थाहा पायौं, यसले गर्दा हामीलाई शंका छ, छानबिन हुनुपर्छ ।
अस्पताल प्रशासन र पीडित पक्षबीच शुक्रवार भएको छलफलले कार्तिक २० गते अस्पताल व्यवस्थापन समितिका पदाधिकारी, प्रशासन र पीडित पक्षबीच बैठक वसी छलफल गर्ने र सोही दिन छानविन समिति गठन गर्न परे गर्ने गरि लिखित सहमती भएसंगै सव उठाउने सहमती भएको मृतकका भाई मोहन पाण्डेले बताउनु भयो । अस्पतालका प्रवक्ता डा. विष्णु गौतमले बिहान ११ बजे सुत्केरी व्यथा लगाउने औषधि दिएपछि साँझ साढे ५ बजे बच्चा निस्कने ५ वटा ‘घर’ खुलिसकेको र अब नर्मल डेलिभरी हुने देखेर केहीबेर छाडिएको बताउनु भयो ।
केही समयमा महिलालाई श्वास प्रश्वासमा समस्या भएको थाहा पाएपछि अपरेसन गर्ने निर्णयमा पुगेर शल्यक्रिया कक्षमा लैजाने क्रममा मृत्यु हुन पुगेको प्रवक्ता गौतमले बताउनु भयो ।
बच्चा खेल्ने ठाउँमा रहेको पानीको फोका फुट्दा पनि यसरी आकस्मिकरुपमा आमाको मृत्यु हुने गरेको उहाँले बताउनु भयो । ‘यही कारणले मृत्यु भयो भनेर भन्न सकिन्न, तर अस्पताल र डाक्टरले जानी–जानी लापर्बाही गर्ने कुरा हुँदैन,’ प्रवक्ता गौतमले भन्नु भयो । लुम्बिनी प्रादेशिक अस्पताल बुटवलमा पछिल्लो समयमा लाप्रवाही अली बढेको छ । उपचारमा संलग्नहुनेहरुको वेथिती र व्यवस्थापन पक्षको कमजोरी भएकोले उपचारार्थ आउने विरामीहरुको अनाहकमा मृत्यु हुने गरेकोले अस्पताल प्रशासन थप जिम्मेवार हुन जरुरी देखिएको छ । पछिल्लो समयमाअस्पतालमा भौतिक पूर्वाधारमा बढी ध्यान दिएको छ यससंगै विरामीको उपचारलाई प्रभावकारी बनाउन जरुरी रहेको सरोकारवालाहरुको माग रहेको छ ।